“Të përfundojë protesta në atë farë feje!”, studenti tregon kush i përçau: Na duhet një plan B, s’mund të rrimë më te kryeministria!

Eraldo Kalemaj, student në Universitetin Bujqësor të Tiranës, i ftuar në Fax News u shpreh sot se protesta përpara kryeministrisë është kapur nga disa përfaqësues të partive politike.

Kalemaj u shpreh se protesta është katandisur si të ishte e një partie opozitare, teksa shton se të rinjtë e forumeve marrin udhëzime në telefon nga drejtuesit e tyre.

Kalemaj u shpreh se FRESSH përçau protestën përpara Ministrisë së Arsimit, ndërsa partitë e opozitës janë ato që po mbajnë protestën poshtë zyrës së Ramës.

Edhe pse ai është një nga studentët që ka marrë pjesë nga dita e parë në protestë, Eraldo shprehet se tashmë ai mendon se ka nevojë për një plan B për vijimin e rezistencës.

“Na duhet një plan B për protestën pasi nuk mund të qëndrojmë aty të kryeministria si të ishim një grup njerëzish partiak, dhe pastaj revolta të kthehet si personale e disa individëve.

Ne kemi çuar tetë kërkesa që janë minimale, që duhet të plotësohen, dhe më pas ulemi në dialog për të arritur pika të tjera. Ne nuk duam dialog pasi nuk duam që krijojmë përfaqësi, që mund të keqpërdoren.

Të gjithë po i shmangen kësaj teme nga frika e kapjes partiake të këtyre personave. Qëndrimi te kryeministria është dyfish dështim krahasuar me atë te Ministria e Arsimit.

Nuk duhet të përfundojë protesta në atë farë feje. Ne duhet të tregojmë forcën tonë, pasi shtetit nuk mund ti bëhet presion me 10 veta. Për mendimin tim ne duhet të nisim me bllokimin e rrugëve, se ndryshe nuk mund të dëgjohemi.

Politikanët tanë mos të rrinë dhe të bëjnë sikur kanë në dorë protestën dhe të bëjnë sikur na ndihmojnë, po të shkojnë dhe të ulen atje në parlament dhe të gjejnë zgjidhjen për këtë situatë. Populli është me studentët në momentin që këta duan që ti japin ngjyrime i japin fundin protestës.

Ata që qëndrojnë aty gjatë gjithë kohës janë partizanët e partive. Unë dhe shokët e mi po presim një vend tjetër për ti dhënë zgjidhje, po atë vend tashmë e kanë zënë personat e partive. Sot nuk është koha për të qenë militantë, është koha që të jemi studentë”, u shpreh Kalemaj.