Shfrytëzon qëndrimin e saj në Kosovë, Mozzik i bën kërkesën publike Dua Lipës

Artistja shqiptare me famë botërore, Dua Lipa, prej dy ditësh po qëndron në Kosovë, në kuadër të festivalit “Sunny Hill”, ylli me famë botërore, elektrizoi skenën e festivalit në natën e parë hapëse, teksa mbrëmë së bashku me familjen ka shijuar si publik performancën e yllit latin, JBalvin.

E ndërsa po qëndron në vendlindje, Gramoz Aliu, i njohur si Mozzik, i ka bërë një kërkesë publike Dua Lipës.

Me anë të një Instastory, ai i kërkon 26-vjeçares të vizitojë Prekazin.

“Dua jam shumë krenar me arritjet e tua, vazhdo para je më e mira. Këto ditë që jeni në Kosovë vizitoni Prekazin”, ka shkruar reperi në një imazhi nga Prekazi.

Sakaq kujtojmë që ditën e djeshme Presidentja e Kosovës, Vjosa Osmani, ka emëruar Dua Lipën ‘Ambasadore Nderi të Republikës së Kosovës’.

Përmes një postimi në “Facebook”, Osmani shkruante se Duan e ka falënderuar për gjithçka që ka bërë dhe po bën që “zëri ynë të dëgjohet kudo në botë”.