Ndërroi jetë në moshë të re, Basha mesazh ngushëllimi familjes së ish-deputetit Bogdani

Një lajm i kobshëm ka tronditur mesditën e kësaj të mërkure, ku është ndarë nga jeta papritur ish deputeti demokrat Gerti Bogdani.
Përmes një postimi në rrjetin social Facebook, Lulzim Basha ka shprehur ngushëllimet e tij për familjen e të ndjerit.

Postimi i plotë i Bashës:

Jam i tronditur nga lajmi për largimin e papritur e të parakohshëm nga jeta të mikut dhe bashkëpunëtorit tim Gerti Bogdani. Ngushëllimet e mia më të ndjera familjes në këto orë të vështira. Mendimet dhe lutjet e mija janë me ta në këtë dhimbje të madhe.

Një shpirt i lirë dhe i përkushtuar ndaj të tjerëve, një politikan i talentuar dhe me vlera, Gerti shërbeu me pasion dhe integritet në funksionet e tij publike, duke nderuar Partinë Demokratike me përfaqësimin dinjitoz brenda dhe jashtë vendit.
Në këtë ditë zie, kur familja ka humbur njeriun e saj më të shtrenjtë, demokratët kujtojnë me respektin më të madh modelin e intelektualit konsensual dhe njërin nga përfaqësuesit e tyre më të përkushtuar, dhe unë një mik të paharrueshëm. U prehtë në paqe!