Kush garon për kryeqytetin? Mbyllet procesi i propozimeve për Primaret në Tiranë dhe Elbasan, shtyhet Durrësi

Partia Demokratike ka njoftuar se ditën e sotme në orën 20:00 është mbyllur  procesi i marrjes së propozimeve nga anëtarësia për kandidatë për zgjedhjet vendore 2023, si dhe procesi i regjistrimit të simpatizantëve në të gjitha degët e PD, për degët Tiranë dhe Elbasan.

Sakaq, për degën Durrës është vendosur që procesi të shtyhet deri në datë 8 nëntor ora 20.00, ndërsa emrat e kandiduar apo vetëkandiduar do të shpallen ditën e hënë.

Kujtojmë se për Tiranën garojnë Belind Këlliçi, Gert Bogdani, Ilir Alimehmeti dhe Adriana Kalaja.

Njoftimi i zyrës së shtypit i PD:

“Duke pasur parasysh interesin e lartë të mediave dhe qytetarëve, Komisioni i Organizimit dhe Kontrollit të Operacioneve Elektorale (KOKOE) pranë Partisë

Demokratike, sqaron si më poshtë vijon:

Bazuar në informacionin e deritanishëm të ardhur nga Sekretariati i Organizimit, KOKOE njofton që procesi i marrjes së propozimeve nga anëtarësia për kandidatë për zgjedhjet vendore 2023, si dhe procesi i regjistrimit të simpatizantëve në të gjitha degët e PD, ka vijuar intensivisht.

Interesi për Primaret është shumë i madh.

Sot, datë 6 nëntor 2022, ora 20.00 mbyllet procesi i marrjes së propozimeve dhe vetëkandidimeve për degët Tiranë dhe Elbasan. Për degën Durrës, KOKOE ka vendosur që ky proces të shtyhet deri në datë 8 nëntor 2022, ora 20.00.

Pas orës 20.00, degët e Tiranës dhe Elbasanit do të depozitojnë fizikisht pranë KOKOE, informacionin për kandidaturat e propozuara në degët përkatëse së bashku me dokumentacionin e dorëzuar pranë tyre në bazë të vendimeve Nr. 11 dt 24.10.2022 dhe Nr. 12 dt 27.1.2022 të cilat dorëzohen pranë KOKOE në selinë qendrore të PD.

Pas shqyrtimit të dokumentacionit të ardhur nga degët, KOKOE do të bëjë publike emrat e kandiduar/vetëkandiduar ditën e hënë.

KOKOE gjen rastin të falenderojë të gjithë kandidatët e propozuar dhe vetëpropozuar që u bënë pjesë e primareve si ushtrimi më i madh i demokracisë së një Partie polikë si dhe të gjitha strukturat e degëve të PD për angazhimin në organizimin e takimeve në seksione/grupseksione për marrjen e kandidaturave. Komisioni Komisionit të Organizimit dhe Kontrollit të Operacioneve Elektorale (KOKOE)”-thuhet në njoftim.