I bashkon i njëjti “hall” në SPAK, Xhaçka shpërthen ndaj Berishës pas sekuestrimit të pronave të bashkëshortit: Kusar me damkë

Ish-ministrja e Punëve të Jashtme, Olta Xhaçka, ka reaguar pas vendimit të SPAK për të sekuestruar 5512 m2 tokë të bashkëshorit të saj Artan Gaçi.

Në reagimin e saj Xhaçka ka akuzuar ish-kryeministrin Sali Berisha si kusar me damkë dhe shpifës” që s’mund t’i bëjë kujt moral, ndërsa thekson se SPAK duhet të bëjë punë i pandikuar nga asgjë.

Ajo u shpreh se bashkëshorti i saj nuk ka marrë asnjë metër katror tokë nga shteti për investimin e tij privat dhe vënia nën sekuestro preventive prej disa javësh e një pjese te kantierit të investimit, për të hetuar origjinën e një prone private qysh nga viti 1994 është pjesë e një procesi që unë as e dyshoj në qëllim, as e komentoj në meritë.

I pyetur gjatë një konference me gazetarët nëse e vlerëson vendimin e gjykatës për sekuestrimin e truallit të bashkëshortit të Ministres Olta Xhaçka, Berisha u shpreh se rasti i këtij të fundit nuk mund të krahasohet me Jamarbër Malltezin që sipas tij ka marrë tokën e vetë pas 50 vitesh.

Kujtojmë se në kuadër të hetimit të nisur mbi bazën e kallëzimit të kryebashkiakut të zgjedhur të Bashkisë së Himarës, Fredi Beleri, SPAK ka vendosur që të ngrijë pasurinë truall prej 5512 metër katror të Artan Gaçit, bashkëshortit të ish-ministres Xhaçka, aty ku po ndërton vila luksoze si investitor strategjik.

Reagimi i plotë:

Nje kusar me damkë dhe shpifës me nam si Sali Berisha nuk mund t’i bëjë askujt moral.

Bashkëshorti im nuk ka marrë asnjë metër katror tokë nga shteti për investimin e tij privat dhe vënia nën sekuestro preventive prej disa javësh e nje pjese te kantierit të investimit, për të hetuar origjinën e një prone private qysh nga viti 1994 është pjesë e një procesi që unë as e dyshoj në qëllim, as e komentoj në meritë.

SPAK-u të bëjë punën e vet i papenguar nga askush, ndërsa Sali Berisha le të vazhdojë të lehë për të tërhequr vëmendjen nga pantallonat e rëna deri në fund!

Kujtojmë që ditën e shtunë u arrestua dhëndri i ish-kryeministrit Berisha, Jamarbër Malltezi, ndërsa ndaj vetë berishës u dha masa detyrim paraqitjeje, pasi akuzohen për privatizimin e ish-klubit Partizani.

Ndërkohë SPAK ka bënë nën sekuestro preventive disa nga pronat e Jamarbër Malltezit.