Anëtarësimet e reja në PS, Veliaj: Me ne bashkohen më të mirët, më të talentuarit. Partitë e tjera e kanë mendjen të tregojnë se kush është ‘shefi’

Të rinj të talentuar kanë zgjedhur t’i bashkohen Partisë Socialiste dhe të bëhen pjesë e partisë më të madhe në vend. Nga Njësia 13, Drejtuesi Politik i PS për Qarkun e Tiranës, Erion Veliaj u dorëzoi kartat e anëtarësimit të rinjve, teksa nënvizoi se familja socialiste mirëpret çdokënd që ka ide të reja dhe dëshiron të kontribuojë për zhvillimin e vendit.

“Kjo kartë është anëtarësia jote në një familje. Në një familje që në dallim nga familjet tona të vogla, ku mund të vendosim vetëm për ato metrat katrorë ku jetojmë vetë, kjo është ajo familja që vendos për ato 28.000 metrat katrorë të Shqipërisë. Sepse kur qeveris Partia Socialiste merr vendime nga Vermoshi deri në Konispol. Kur qeveris Tiranën merr vendime të rëndësishme në Këshill Bashkiak për çerdhen, për kopshtin, për shkollën 9-vjeçare tek Kopshti Botanik, për shkollën, gjimnazin te Parku Olimpik, si fuqia që vjen nga vota. Kur je në familjen tonë, je tek ajo familje që vendos që ato nevojat e komunitetit i përkthen në votë, ato vota i përkthen në vendime, ato vendime i përkthen në projekte, ato projekte bëhen punë edhe vepra për komunitetin. Kjo është diferenca”, tha Veliaj.

Ai shtoi se ndihet krenar që çdo ditë e më shumë partisë socialiste i bashkohen më të mirët. “Kam takuar çuna dhe goca me të gjitha 10-ta, çuna dhe goca që janë presidentë në gjimnazet e tyre dhe duan të jenë pjesë e partisë sonë.”

Mandej, Veliaj tha se Partia Socialiste është fitimtare sepse ulet bashkë me popullin dhe sillet si familje, jo si parti që do të urdhërojë dhe të tregojë se kush është shefi.

“Ne nuk jemi fitimtarë që t’i sillemi të tjerëve si shefa, ne jemi në fakt fitimtarë t’u sillemi të tjerëve si shërbëtorë dhe të jemi aty për çdo nevojë të komunitetit. Njerëzit e mëdhenj janë ata që janë të përulur, që merren me hallet e njerëzve, që kuptojnë hallet e njerëzve dhe që e shfrytëzojnë fitoren e madhe, jo për të shitur mend edhe për t’u sjellë si shefa, por edhe si instrument për të mbaruar ca punë dhe për t’iu thënë njerëzve: Këto kërkesa, sa kemi takat dhe sa të jetë Partia Socialiste në fuqi, do t’i ndjekim çdo ditë dhe çdo natë, derisa të sigurohemi që i mbajmë të gjitha premtimet ashtu siç kemi ecur deri më sot”, u shpreh Veliaj.