Deputeti kosovar: Kosova, krahinë e Shqipërisë. Një ditë do të jemi bashkë

“Kosova është krahinë e Shqipërisë, dhe në asnjëherë nuk kemi hequr dorë nga bashkimi kombëtar”.

Kështu është shprehur deputeti i Parlamentit të Kosovës, Zafir Berisha në një intervistë për emisionin ‘Ora e Fundit’ në Klan Kosova.

Sipas Berishës, Shqipëria së bashku me Kosovë, Çamëri dhe shqiptarët në Maqedoni, një ditë do të jenë një.

‘Ne jemi shqiptarë, që jetojmë në krahinën e Shqipërisë, që quhet Kosovë. Dhe, sot ose nesër, herët apo vonë Shqipëria do të jetë një dhe meqë sot rrethanat e politikës globale na kanë pozicionuar ashtu siç na kanë pozicionuar, kjo nuk nënkupton që kemi hequr dorë nga ideja e Shqipërisë natyrale’, është shprehur Zafir Berisha.

“Përse duhet të heqim dorë nga kjo?. ‘Asnjë komb nuk ka hequr dorë’.

‘Ne edhe nënë edhe babë e kemi Shqipërinë. Kur them Shqipërinë e kam fjalën për Shqipërinë, Kosovën, shqiptarët në Maqedoni e deri në Çamëri”, ka thënë ish-ushtari i Ushtrisë Çlirimtare të Kosovës.

Duke folur për debatin mbi ‘kombin kosovar’, Berisha, është shprehur se ai është një mendim qesharak dhe se kombi kosovar nuk ekziston.

‘Të merrem unë me këtë termin që disa e kanë shpikur, sepse s’kanë punë tjetër, njëfarë termi më duket termi ‘kombi kosovar’ kjo është më shumë se qesharake, vetëm me të shkuar në mendje e lërmë ta thuash, aq më keq që diçka e tillë të trumbetohet’, ka thënë Berisha.

Zafir Berisha është deputet i Nismës për Kosovën, si dhe më parë ka qenë edhe luftëtar në Ushtrinë Çlirimtare të Kosovës(UÇK).