Kosova përzë Boiken Abazin në Shqipëri (DOKUMENT)

Deportohet nga Kosova Boiken Abazi

Vetëvendosje përmes një kumtese njofton se Boiken Abazi, pasi është arrestuar prej policëve civilë, është dërguar në stacion, ku i është dhënë një vendim për ekstradim me forcë, të cilin Boiken Abazi ka refuzuar ta nënshkruajë, për shkak se argumentet e paraqitura në atë vendim,siç thotë Vetëvendosje, janë të pavërteta, transmeton Koha.net.

Në vendimin policor shkruhet se Boiken Abazi ka dalë prej Kosovës në datën 3.2.2016 dhe nuk ka të dhëna për hyrje të ligjshme në Kosovë. Ky është një mashtrim i drejtpërdrejtë, thotë Vetëvendosje. Boiken Abazi ka hyrë legalisht në Kosovë, në të njëjtën ditë, duke qenë në shoqërimin e nënkryetares së Kuvendit, Aida Dërguti, dhe Ramadan Deliut, dhe duke kaluar kontrollin normal kufitar në pikën doganore të Morinës.

Vetëvendosje thotë se Boiken Abazi nuk është përballur me asnjë trupë gjykuese, nuk i është dhënë mundësia të ankohet, apo të apelojë vendimin që është marrë ndaj tij, dhe nuk është lejuar të takohet me avokat – duke ia pezulluar kështu arbitrarisht edhe të drejtat e liritë themelore të përshkruara në konventat ndërkombëtare ku bën pjesë edhe Kosova.

Menjëherë, Boiken Abazi është dërguar me shoqërim të policisë në zonën neutrale mes Kosovës e Shqipërisë. Atë nuk e kanë lejuar të marrë as veshjet e as dokumentet e gjësendet personale. Pra, Boiken Abazi është trajtuar si person i rrezikshëm, edhe pse askund në vendim nuk shkruhet se ai është person i rrezikshëm e se duhet trajtuar si i tillë.

Gjatë udhëtimit, policët i kanë thënë se po detyrohen që t’i bëjnë këto veprime vetëm për shkak të urdhrave edhe pse nuk po pajtohen me to.
Deportimi i Boiken Abazit, i cili është anëtar i Kryesisë dhe Sekretar për Marrëdhënie me Jashtë në Vetëvendosje,sipas kësaj partie, po bëhet sepse është anëtar i Vetëvendosjes dhe sepse është shtetas i Shqipërisë.

Prej Kosovës nuk deportohen shtetasit e Serbisë që ushtrojnë aktivitete në strukturat ilegale paralele në Kosovë, apo anëtarët e mafisë ballkanike që bashkëveprojnë me pushtetarët e Kosovës.
Por, po deportohet një qytetar i Shqipërisë, vetëm për angazhimet dhe aktivitetet e tij politike e kombëtare, thotë kumtesa nga VV .
Shteti i fundit që ekstradon qytetar të Shqipërisë për shkak të angazhimit të tyre politik, ka qenë Greqia. Tash, këtë gjë e bën dhe Kosova.

“Qeveria antishqiptare e proserbe e Kosovës, po kthen në kujtesën tonë vitet më të errëta të përndjekjes politike dhe të terrorit ndaj shqiptarëve. Kosova e Zajednicës dirigjohet nga Beogradi i Vuçiqit, prandaj ajo nuk mund të jetë as demokraci e as shtet i shqiptarëve, edhe pse shqiptarët luftuan dhe dhanë jetën për të pasur pavarësi në tokën e tyre” thotë Vetëvendosje dhe përfundon:

“Neomillosheviqët e qeverisë së Isa Mustafës nuk do t’i lejojmë t’i përzënë arbitrarisht shqiptarët prej Kosovës, për shkak të angazhimit të tyre politik. Mbështetësit e fashizmit në Kosovë janë duke gjetur tek qytetarët e Shqipërisë “hebreun” e tyre, dhe janë duke i përdorur mjetet e tyre propagandistike, mediet e portalet, për të bërë thirrje për linçime. Por Kosova është atdhe i të gjithë shqiptarëve kudo që ndodhen, e shumë shpejt do të bëhet edhe republikë demokratike, prej së cilës asnjë qytetar, i asnjë vendi të botës, nuk do të mund të deportohet arbitrarisht.