Kurti goditet në Kuvend, reagon kryeministri Rama

Kryeministri Edi Rama ka reaguar në lidhje me sulmin që iu bë kryeministrit të Kosovës Albin Kurti në seancën në Kuvend.

Rama e cilësoi turp sjelljen e opozitës së Kosobës, ndërsa tha se në Kuvend luftohet me ide dhe argumente, jo me dhunë.

Ndër të tjera Rama shkruan: “Imagjinojini si ndjehen aleatët dhe miqtë e pazëvendësueshëm të Kosovës e të shqiptarëve, kur shohin se si kapen për fyti shqiptarët”.

Postimi i Ramës:

Të mos jesh dakord me kryeministrin është demokratike, ta shprehësh kështu kundërshtinë është të njollosësh veten, zgjedhësit e tu dhe krejt shtetin me një turp që sot i bën dëm Kosovës edhe ndërkombëtarisht, më shumë se sa çfarëdo qëndrimi politik që po ia kundërshton kryeministrit!

Imagjinojini si ndjehen aleatët dhe miqtë e pazëvendësueshëm të Kosovës e të shqiptarëve, kur shohin se si kapen për fyti shqiptarët, aty ku duhet të luftohet me ide e me fjalë, jo me sharje e me grushta! Uroj shumë që opozita të distancohet nga kjo sjellje e turpshme dhe t’i shërbejë Kosovës me forcën e shembullit, jo me shembullin e forcës!