Përfundojnë procedurat, SPAK shpall në kërkim ndërkombëtar Adriatik Llallën

SPAK, ka përfunduar procedurat ligjore dhe ka shpallur ne kërkim ndërkombëtar, emrin e Adriatik Llallës. Dtën e djeshme, policia i ktheu përgjigje SPAK-ut për Adriatik Llallën, pas kërkimeve që rezultuan pa sukses.

Policia e Tiranës i është përgjigjur me një shkresë zyrtare SPAK, ku e informon se ish-kryeprokurori Adriatik Llalla nuk është gjendur. Policia thotë se ka bërë të gjitha verifikimet me metoda speciale, por nuk e ka gjetur, ndaj dhe i ka kërkuar SPAK të nisë procedurat për ta shpallur Llallën në kërkim ndërkombëtar.

Nga verifikimet, Llalla rezulton të jetë larguar jashtë vendit, pak ditë para shpalljes së vendimit të gjykatës për ta dënuar atë me dy vite burg dhe për t’i konfiskuar pasurinë, ku menjëherë pas kësaj ai u shpall në kërkim kombëtar. Nga ana tjetër, SPAK është i detyruar të nisë procedurat për shpalljen në kërkim ndërkombëtar të Llallës, menjëherë pas marrjes së shkresës nga policia.

Ndërkohë, SPAK i është përgjigjur shkurtimisht interesimit të gazetarëve lidhur me çështjen, duke thënë se “SPAK është duke bërë procedurat që parashikon ligji. Detajet nuk mund të bëhen publike”.