Fati u ka trokitur në derë! Fshati mahnitës që shet shtëpi për 1 dollar

Në keni ëndërruar ndonjëherë që të keni një shtëpi në një fshat të bukur, dhe jo shqiptar, por italian, fati duket se ju ka troktitur në derë.

Në Ollolai të rajonit malor Barbagia të Sardenjës mund ta blesh një shtëpi për pak më shumë se vetëm 1 dollar.

Ky çmim e ka një arsye. Me qindra shtëpi po shiten atje për këtë shumë simbolike, sepse janë të braktisura.

Bukuria e zonës është e madhe, ama banesat e ndërtuara me gurë, që janë nxjerrë në shitje, e kanë një problem. Ato janë në gjendje jo të mirë e duhen meremetuar brenda 3 viteve.

Riparimi do të kushtonte ndoshta 25 mijë dollarë. Planet për të injektuar frymë të re në venat e këtij komuniteti i detyrohen frikës se, Ollolai mund të kthehet në një qytezë fantazmë.

Në gjysmën e shekullit të kaluar, popullsia e tij u tkurr nga 2.250 në 1.300 banorë dhe numri i foshnjeve që lindin përvit është tejet i vogël.

Disa mënyra tradicionale të jetës, megjithatë vazhdojnë të mbijetojnë. Barinjtë vendas nuk kanë hequr dorë nga prodhimi i djathit të deles, “Casu Fiore Sardo”, për të cilin është e njohur e gjithë zona, ndërsa artizanët thurin ende shporta mjaft të bukura.